Түркістан облысында өткен жылы жалпы мемлекет есебінен құрылысы басталған 33 мектептің 20-сы биыл пайдалануға беріледі. Қалған 13 мектептің құрылысы келесі жылы аяқталады.
Сонымен қатар «Жайлы мектеп» ұлттық жобасы аясында 2023-2025 жылдары облыста 49 мың оқушыға шақталған 63 мектептің құрылысы жүргізіліп, 2025-жылға дейін өңірде 96 білім ошағы бой көтеретін болады. Бұл еліміздегі ең үлкен көрсеткіш.
«Жайлы мектеп» ұлттық жобасы Мемлекет басшысы Қасым-Жомарт Тоқаевтың тапсырмасымен жүзеге асырылуда. Аталған жоба аясында биыл Жетісай ауданында 6 мектеп салынады. Атап айтсақ, Жетісай қаласынан 1500 орындық, Асықата кентінен 900 орындық және Ынтымақ ауылдық округінің Ақниет елді мекенінен 600 орындық мектептердің құрылысы өткен жылы басталса, биылғы жылы Жетісай қаласынан 900 орындық және Ш.Ділдәбеков ауылдық округінің Қызылтаң елді мекенінен 600 орындық, Қызылқұм ауылдық округінің Қызылқұм елді мекенінен 600 орындық білім ошақтарының құрылысы басталып, 2025 жылы қолданысқа тапсырылады деп күтілуде.
Пәндік кабинеттермен, оның ішінде робототехника, кең жолақты интернет, жаңа модификацияланған кабинеттермен жабдықталатын мектептерде оқушылардың сапалы білім алуларына, жоғары және бірінші санатты мұғалімдер құрамының пайыздық үлесін, педагогикалық қызметкерлердің біліктіліктерін арттыруға толықтай жағдай жасалмақ.
Жетісай ауданының әкімі Серік Мамытов «Жайлы мектеп» Ұлттық жобасы аясында құрылысы жүргізіліп жатқан білім беру нысандарын аралап, жұмыстардың барысымен танысты.
